ന്യൂഡല്ഹി: വഖഫ് നിയമം അടിയന്തിരമായി റദ്ദാക്കണമെന്ന് ആവശ്യപ്പെട്ട് സമസ്ത വീണ്ടും സുപ്രീംകോടതിയെ സമീപിച്ചു. വഖഫ് നിയമത്തിന്റെ പേരില് ഭൂമി പിടിച്ചെടുക്കുകയാണെന്നും കെട്ടിടങ്ങള് തകര്ക്കുകയാണെന്നുമാണ് സമസ്തയുടെ പരാതി. ഇക്കാര്യത്തില് സുപ്രീം കോടതിയുടെ അടിയന്തര ഇടപെടല് വേണമെന്നും സമസ്ത ഹര്ജിയില് ആവശ്യപ്പെട്ടു. നിലവിലെ നടപടികള് തടയണമെന്നും അപേക്ഷയില് പറയന്നുണ്ട്.
അഭിഭാഷകന് സുള്ഫിക്കര് അലി മുഖേനയാണ് സമസ്ത കോടതിയെ സമീപിച്ചത്. നേരത്തെ വഖഫ് നിയമ ഭേദഗതിയെ ചോദ്യം ചെയ്ത് സമസ്ത സുപ്രീം കോടതിയെ സമീപിച്ചിരുന്നു. വഖഫ് സ്വത്തുക്കള് സര്ക്കാര് സ്വത്താക്കി മാറ്റാനാണ് നിയമം കൊണ്ടുവന്നതെന്നായിരുന്നു സമസ്ത ഫയല് ചെയ്ത ഹര്ജിയിലെ പരാതി. വഖഫ് നിയമഭേദഗതി വഖഫ് ബോര്ഡുകളെ ദുര്ബലപ്പെടുത്തുമെന്നും വഖഫ് സ്വത്തുകള് സര്ക്കാര് സ്വത്തുക്കളായി മാറുമെന്നും ഹര്ജിയില് പറഞ്ഞിരുന്നു. ഇപ്പോള് വഖഫ് നിയമത്തില് അടിയന്തര സ്റ്റേ ആവശ്യപ്പെട്ടാണ് പുതിയ ഹര്ജി നല്കിയത്.
