പാലക്കാട്: പാലക്കാട് മാത്തൂരില്‍ കുടുംബ വഴക്കിനെ തുടര്‍ന്ന് ഭര്‍ത്താവ് ഭാര്യയെ വെട്ടിക്കൊലപ്പെടുത്തി. മാത്തൂര്‍ പല്ലഞ്ചാത്തനൂര്‍ പൊള്ളംപാടം വീട്ടില്‍ ഇന്ദിരയാണ് കൊല്ലപ്പെട്ടത്. 55 വയസ്സായിരുന്നു. ഭര്‍ത്താവ് വാസു(62) ആണ് ഇന്ദിരയെ കൊലപ്പെടുത്തിയത്. ബുധനാഴ്ച രാവിലെ പത്തിനായിരുന്നു നാടിനെ നടുക്കിയ സംഭവം.
രാവിലെ ഇന്ദിരയുടെ നിലവിളി കേട്ട് അയല്‍വാസിയായ രാജനാണ് ആദ്യം ഓടിയെത്തിയത്. വീടിന്റെ അടുക്കള ഭാഗത്ത് വെട്ടേറ്റു മരിച്ച നിലയില്‍ കിടക്കുകയായിരുന്നു ഇന്ദിര. വീടിനു മുന്‍വശത്ത് കൊടുവാളുമായി വാസു നില്‍പ്പുണ്ടായിരുന്നു. വാസുവിന്റെ കൈയിലുണ്ടായിരുന്ന കൊടുവാള് രാജന്‍ പിടിച്ചുമാറ്റി.
കുടുംബവഴക്കാണ് കൊലപാതകത്തിന് കാരണമെന്ന് പൊലീസ് പറഞ്ഞു. ഭാര്യയും മക്കളും പക്ഷംചേര്‍ന്ന് തന്നെ കുറ്റപ്പെടുത്തുന്നതായി വാസു ആരോപിച്ചിരുന്നു. ഇതിനെത്തുടര്‍ന്നാണ് വാസു ഭാര്യയെ വെട്ടിക്കൊന്നതെന്നും പൊലീസ് പറഞ്ഞു. ചൊവ്വാഴ്ച രാത്രി ഇന്ദിരയും വാസുവും തമ്മില്‍ വാക്കുതര്‍ക്കം ഉണ്ടായിരുന്നു. ബുധനാഴ്ച രാവിലെ ആണ്‍മക്കള്‍ ജോലിക്ക് പോയ ശേഷം വീണ്ടും ഇരുവരും തമ്മില്‍ വാക്കുതര്‍ക്കമായി. ഇതേത്തുടര്‍ന്ന് പ്രകോപിതനായ വാസു കൊടുവാള്
കൊണ്ട് ഇന്ദിരയെ വെട്ടിക്കൊലപ്പെടുത്തുകയായിരുന്നു.
