ന്യൂഡല്ഹി: മലയാളി സൂപ്പര്താരം മോഹന്ലാലിനെ തേടി ദാദാ സാഹേബ് ഫാല്ക്കെ പുരസ്കാരം. ഇന്ത്യന് സിനിമയ്ക്ക് നല്കിയ സമഗ്ര സംഭാവനകള് പരിഗണിച്ചാണ് മോഹന്ലാലിന് രാജ്യത്തെ പരമോന്നത ചലച്ചിത്ര ബഹുമതിയായ ദാദാ സാഹേബ് ഫാല്ക്കെ പുരസ്കാരം നല്കി ആദരിക്കുന്നത്. 2023 ലെ പുരസ്കാരമാണ് ഇപ്പോള് പ്രഖ്യാപിച്ചത്. തലമുറകളെ പ്രചോദിപ്പിക്കുന്നതാണ് മോഹന്ലാലിന്റെ സിനിമായാത്രകളെന്ന് പുരസ്കാര വാര്ത്ത പുറത്തുവിട്ടുകൊണ്ടുള്ള കുറിപ്പില് പറയുന്നു.
നടനും സംവിധായകനും നിര്മാതാവുമായ മോഹന്ലാലിനെ ആദരിക്കുന്നുവെന്നും അദ്ദേഹത്തിന്റെ അതുല്യമായ പ്രതിഭ, വൈദ?ഗ്ധ്യം, കഠിനാധ്വാനം തുടങ്ങിയവ ഇന്ത്യന് സിനിമാ ചരിത്രത്തില് സുവര്ണസ്ഥാനം നേടിയെന്നും കുറിപ്പിലുണ്ട്.
2025 സെപ്തംബര് 23-ന് നടക്കുന്ന എഴുപത്തിയൊന്നാമത് നാഷണല് ഫിലിം അവാര്ഡ്സില് വച്ച് പുരസ്കാരം വിതരണം ചെയ്യും. കഴിഞ്ഞ വര്ഷത്തെ ദാദാ സാഹേബ് ഫാല്ക്കെ പുരസ്കാരം ബോളിവുഡ് നടന് മിഥുന് ചക്രവര്ത്തിക്കായിരുന്നു. സംവിധായകന് അടൂര് ഗോപാലകൃഷ്ണനാണ് ഇതിന് മുമ്പ് ഫാല്ക്കെ പുരസ്കാരം ലഭിച്ച മലയാളി. 2004 ലാണ് അദ്ദേഹത്തിന് പുരസ്കാരം ലഭിച്ചത്.
രാജ്യത്തെ പ്രഥമ സമ്പൂര്ണ ഫീച്ചര്സിനിമയായ രാജ ഹരിശ്ചന്ദ്രയുടെ സംവിധായകനായ ദാദാ സാഹേബ് ഫാല്ക്കെയുടെ സ്മരണാര്ത്ഥം കേന്ദ്രസര്ക്കാര് 1969-ല് ഏര്പ്പെടുത്തിയതാണ് പുരസ്കാരം
