ഒട്ടാവ: ഇസ്രയേല് പ്രധാനമന്ത്രി ബെഞ്ചമിന് നെതന്യാഹുവിനെതിരെ അറസ്റ്റ് ഭീഷണിയുമായി കനേഡിയന് പ്രധാനമന്ത്രി മാര്ക്ക് കാര്ണി. കാനഡയില് പ്രവേശിച്ചാല് നെതന്യാഹുവിനെ അറസ്റ്റ് ചെയ്യുമെന്നും മുന് പ്രധാനമന്ത്രി ജസ്റ്റിന് ട്രൂഡോയുടെ പ്രതിജ്ഞ പാലിക്കുമെന്നും കാര്ണി വ്യക്തമാക്കി. രാജ്യാന്തര ക്രിമിനല് കോടതി പ്രഖ്യാപിച്ച അറസ്റ്റ് വാറന്റ് നടപ്പാക്കുമെന്നും കനേഡിയന് പ്രധാനമന്ത്രി മാര്ക്ക് കാര്ണി വ്യക്തമാക്കി.
ബ്ലൂംബെര്ഗിന് നല്കിയ അഭിമുഖത്തിലാണ് അദ്ദേഹം ഇക്കാര്യം വ്യക്തമാക്കിയത്. ഗാസ സംഘര്ഷം, മനുഷ്യരാശിക്കെതിരായ കുറ്റകൃത്യങ്ങള് എന്നിവയുമായി ബന്ധപ്പെട്ട കേസുകളില് നെതന്യാഹുവിനെ തടങ്കലില് വയ്ക്കാനുള്ള മുന് പ്രധാനമന്ത്രി ജസ്റ്റിന് ട്രൂഡോയുടെ പ്രതിജ്ഞ പാലിക്കുമോ എന്ന ചോദ്യത്തിന് അതെ എന്നായിരുന്നു കാര്ണിയുടെ ഉത്തരം.
കഴിഞ്ഞ നവംബറിലാണ് ബെന്യാമിന് നെതന്യാഹുവിനും ഇസ്രയേല് മുന് പ്രതിരോധമന്ത്രി യൊയാവ് ഗലാന്റിനുമെതിരെ രാജ്യാന്തര ക്രിമിനല് കോടതി പ്രഖ്യാപിച്ച അറസ്റ്റ് വാറന്റ് പ്രഖ്യാപിച്ചത്. സ്ത്രീകളെയും കുട്ടികളെയുമടക്കം കൂട്ടക്കൊല നടത്തുകയും ജനങ്ങളെ പട്ടിണിക്കിടുകയും ആശുപത്രികളടക്കം തകര്ക്കുകയും ചെയ്യുന്നുവെന്ന് ചൂണ്ടിക്കാട്ടിയായിരുന്നു നെതന്യാഹുവിനെതിരായ ഐസിസി നടപടി.
