ടി.പി.ചന്ദ്രശേഖരന് വധക്കേസിലെ പ്രതി കൊടി സുനിയും സംഘവും മദ്യപിക്കുന്ന ദൃശ്യങ്ങള് പുറത്ത് വന്നതിന് പിന്നാലെ സര്ക്കാരിനെ രൂക്ഷമായി വിമര്ശിച്ച് പ്രതിപക്ഷ നേതാവ് വി.ഡി സതീശന്.
‘തന്തൂരി ചിക്കന്, ലേറ്റസ്റ്റ് സ്മാര്ട്ട് ഫോണ്…ഇനി സര്ക്കാരിനോട് ഒന്നേ പറയാനുള്ളൂ, ചൂട് കാലമൊക്കെ അല്ലേ കൊടിസുനിയുടെ മുറി ഒന്ന് എയര്കണ്ടീഷന് കൂടി ചെയ്ത് കൊടുക്കണം. ടി.പി വധത്തിന്റെ ഗൂഢാലോചനയില് പങ്കെടുത്ത സിപിഎം നേതാക്കളുടെ പേര് വെളിപ്പെടുത്തുമെന്ന ഭയമാണ് സര്ക്കാരിന്. അതുകൊണ്ടാണ് സുനി ചോദിക്കുന്ന സൗകര്യങ്ങള് കേരളത്തെ മുഴുവന് അപമാനിച്ച് സര്ക്കാര് നല്കുന്നത്’വി.ഡി സതീശന് പറഞ്ഞു.
കണ്ണൂര് സെന്ട്രല് ജയിലിലുള്ള പ്രതികളായ മുഹമ്മദ് ഷാഫിയെയും ഷിനോജിനെയും കഴിഞ്ഞ 17-ന് തലശ്ശേരി അഡീഷണല് ജില്ലാ കോടതിയില് ഹാജരാക്കാന് കൊണ്ടുപോയപ്പോഴാണ് സംഭവം. തലശ്ശേരിയിലെ ഹോട്ടലിന്റെ മുറ്റത്തുവെച്ചായിരുന്നു പരസ്യ മദ്യപാനം. പ്രതികള്ക്ക് അകമ്പടി പോയ എആര് ക്യാമ്പിലെ സിവില് പോലീസ് ഉദ്യോഗസ്ഥരായ വൈശാഖ്, വിനീഷ്, ജിഷ്ണു എന്നിവരെ മദ്യപാനത്തിന്റെ ദൃശ്യങ്ങള് പുറത്തുവന്നതോടെ സസ്പെന്ഡ് ചെയ്തിരുന്നു.
