കൊച്ചി: പ്രമാദമായ നടിയെ ആക്രമിച്ച കേസില് എറണാകുളം പ്രിന്സിപ്പല് സെഷന്സ് കോടതി നാളെ വിധി പറയും. നടന് ദിലീപ് അടക്കം ഒന്പത് പ്രതികളാണ് കേസിലുള്ളത്. കേസിലെ 9 പ്രതികളും നാളെ കോടതിയില് ഹാജരാകണമെന്ന് കോടതി ആവശ്യപ്പെട്ടിട്ടുണ്ട്. ഏഴു വര്ഷത്തോളം നീണ്ട വിചാരണ നടപടികള്ക്കൊടുവിലാണ് വിധി പ്രസ്താവം. അഞ്ചുവര്ഷത്തിലധികമാണ് കേസിന്റെ വിസ്താരം നടന്നത്. കഴിഞ്ഞ തവണ കോടതി ചോദിച്ച 22 ചോദ്യങ്ങള്ക്ക് പ്രോസിക്യൂഷന് മറുപടി നല്കിയിരുന്നു. ഇതിനു പിന്നാലെ എട്ടിന് വിധി പറയുമെന്ന് കോടതി വ്യക്തമാക്കുകയായിരുന്നു.
ദിലീപും പള്സര് സുനിയും ഉള്പ്പെടെ കേസിലാകെ ഒമ്പത് പ്രതികളാണുള്ളത്. പള്സര് സുനി എന്നറിയപ്പെടുന്ന സുനില്കുമാറാണ് കേസിലെ ഒന്നാംപ്രതി. നടിയെ തട്ടിക്കൊണ്ടു പോകുന്നതിനും ബലാല്സംഗത്തിനും നേതൃത്വം നല്കിയത് സുനിയായിരുന്നു. ദൃശ്യങ്ങള് പകര്ത്തിയതും സുനിയായിരുന്നു. ദിലീപ് കേസില് എട്ടാം പ്രതിയാണ്. ഗൂഢാലോചനാ കുറ്റമാണ് ദിലീപിനെതിരെ ചുമത്തിയിരിക്കുന്നത്. ആക്രമിക്കപ്പെട്ട നടിയോട് ദിലീപിന് മുന്വൈരാഗ്യം ഉണ്ടായിരുന്നുവെന്നും ഇതേത്തുടര്ന്നാണ് കൃത്യം ആസൂത്രണം ചെയ്ത് നടപ്പാക്കിയത് എന്നുമാണ് അന്വേഷണ സംഘത്തിന്റെ കണ്ടെത്തല്.
2017 ഫെബ്രുവരി പതിനേഴിന് അങ്കമാലി അത്താണിക്ക് സമീപം ഓടിക്കൊണ്ടിരുന്ന കാറിലാണ് യുവനടി ആക്രമിക്കപ്പെട്ടത്. 2017 നവംബറില് കുറ്റപത്രം സമര്പ്പിച്ചു. 2018 മാര്ച്ച് എട്ടിന് എറണാകുളം പ്രിന്സിപ്പല് സെഷന്സ് കോടതിയില് വിചാരണ ആരംഭിച്ചു. 2018 ജൂണില് സിബിഐ അന്വേഷണം ആവശ്യപ്പെട്ട് ദിലീപ് ഹൈക്കോടതിയില് സമര്പ്പിച്ച ഹര്ജി ഹൈക്കോടതി സിംഗിള് ബെഞ്ച് തള്ളി. സാക്ഷി വിസ്താരം പൂര്ത്തിയായത് നാലര വര്ഷം കൊണ്ടായിരുന്നു. 2024 ഡിസംബര് 11നാണ് കേസിലെ അന്തിമവാദം ആരംഭിച്ചത്. 2025 ഏപ്രില് ഏഴിന് സിബിഐ അന്വേഷണം ആവശ്യപ്പെട്ടുള്ള ദിലീപിന്റെ ഹര്ജി ഹൈക്കോടതി ഡിവിഷന് ബെഞ്ചും തള്ളി. 2025 ഏപ്രില് 9-ന് പ്രതിഭാഗത്തിന്റെ വാദം പൂര്ത്തിയായി. തുടര്ന്ന് പ്രോസിക്യൂഷന്റെ മറുപടി വാദവും പൂര്ത്തിയായി.
കേസിന്റെ ആദ്യഘട്ടത്തില് പ്രതി ചേര്ക്കാതിരുന്ന നടന് ദീലീപിനെ തെളിവുകളുടെ അടിസ്ഥാനത്തില് ജൂലൈ 10-ന് അറസ്റ്റ് ചെയ്തു. പിന്നാലെ ദിലീപിനെ അഭിനേതാക്കളുടെ സംഘടനയായ അമ്മയില് നിന്ന് പുറത്താക്കി. 85 ദിവസത്തിന് ശേഷം, 2017 ഒക്ടോബര് മൂന്നിന് എട്ടാം പ്രതിയായ ദിലീപിന് ജാമ്യം ലഭിച്ചു.
ഏറെ ചര്ച്ചയായ ഈ കേസ്, വിമന് ഇന് സിനിമ കളക്ടീവ് എന്ന സംഘടനയുടെ പിറവിക്ക് ഇടയാക്കി. സിനിമാ മേഖലയിലെ പ്രശ്നങ്ങളെ കുറിച്ച് പഠിക്കാന് ഹേമ കമ്മിറ്റിയെ നിയോഗിക്കാന് സര്ക്കാരിനെ പ്രേരിപ്പിച്ചു. കേരളത്തിലെ സ്ത്രീസുരക്ഷയെപ്പറ്റിയും സിനിമാരംഗത്ത് സ്ത്രീകള് നേരിടുന്ന പ്രശ്നങ്ങളെപ്പറ്റിയും വലിയ തോതില് സമൂഹത്തില് ചര്ച്ച ചെയ്യപ്പെടാന് കേസ് വഴി വച്ചു.
